Татарстанның фермер династияләре лаеклы бүләкләр алдылар
Бүген Татарстан Республикасы Авыл хуҗалыгы һәм азык-төлек министрлыгында Фермер ассоциациясенең ХX съезды кысаларында «Гаилә фермер династияләре» республика конкурсында җиңүчеләрне бүләкләделәр. Конкурста катнашкан Татарстанның 12 крестьян (фермер) хуҗалыгыннан 5 КФХ 100 мең сум күләмендә премияләр алдылар. Алар арасында Арча, Буа (2 вәкил), Кама Тамагы һәм Чистай районнарыннан фермер династияләре бар.
«Безнең фермерлар аерым хөрмәткә ия. Һәр кеше дә авыл хуҗалыгында үз эшен ача алмый. Авылда эш бервакытта да җиңел булмады, әмма һәрвакыт илнең азык-төлек иминлеген тәэмин итеп килә. Шуңа күрә дәүләт тарафыннан аңа ярдәм күрсәтелә. Тулы бер династияләрнең барлыкка килүе сөендерә. Бүген без аларга лаеклы бүләкләр тапшырабыз», - диде Татарстан Республикасы Премьер министры урынбасары – Татарстан Республикасы авыл хуҗалыгы һәм азык-төлек министры Марат Җәббаров.
Мәсәлән, Чистай районында Гиниятовлар гаиләсе 27 ел дәвамында үсемлекчелек белән шөгыльләнә. Үзләренең 553,7 га җир кишәрлегендә 2019 елда 1533 тонна бөртекле ашлык үстергәннәр.
Кама Тамагы районының Кече Мәрәтхуҗа авылыннан Ганибаевлар гаиләсе 21 елдан артык үсемлекчелек белән генә түгел, ә терлекчелек белән дә шөгыльләнә. Хуҗалыкта 100 баштан артык эре мөгезле терлек исәпләнә. 2018 елда аларның уллары Ранил 50 баш эре мөгезле терлек өчен сөтчелек фермасы төзүгә 300 мең сум грант алды.
Буа районының Яңа Тинчәле авылыннан Сибъгәтуллиннар гаиләсе 17 ел үсемлкчелек белән шөгыльләнә. 2019 елда алар 2059 тонн зерна, 115 тонна рапс һәм 8068 тонна шикәр чөгендере үстергәннәр.
Буа районының Кишер Аксуы авылыннан Салаватуллиннар гаиләсе 18 ел буена яшелчәчелек һәм терлекчелек белән шөгыльләнә. 2019 елда алар 913,9 тонна кишер, 427 тонна чөгендер, 25 тонна суган 478 тонна бәрәңге үстергәннәр, шулай ук 11 ат тоталар.
Арча районының Түбән Пышалым авылыннан Фатыйховлар гаиләсе 13 ел буена ит-сөт юнәлешендә эшчәнлек алып бара һәм алар бөртекле ашлык үстерәләр. Аларның крестьян-фермер хуҗалыгында 27 баш сыер исәпләнә, 2600 тонна бөртекле ашлык, 1640 тонна бәрәңге үстерелгән, 637 тонна ит һәм 4060 тонна сөт җитештерелгән.
Шуны искәртеп узабыз, 2019 елның 16 декабреннән 2020 елның 17 гыйнварына кадәр барган конкурста кимендә 2 буын фермерлар булган һәм бүгенге көндә гамәлдәге крестьян-фермер хуҗалыгы статусына ия бер гаилә әгъзалары һәм аларның туганнары катнаша алды.