Район хәбәрләре: Кайбыч районында авыл хуҗалыгы алдынгылары Слеты узды
Бу атнада Олы Кайбыч авылында Кайбыч районы авыл хуҗалыгы алдынгылары Слеты узды. Анда Татарстан Республикасы авыл хуҗалыгы һәм азык-төлек министры урынбасары Ришат Хәбипов, муниципаль район башлыгы Альберт Рәхмәтуллин, "Ак Барс" холдинг компаниясе” АҖенең АПК буенча Департаменты директоры Эдуард Хөсәенов, шулай ук 130дан артык хезмәт алдынгылары - терлекчеләр, игенчеләр, хезмәт ветераннары катнашты.
Сәламләү сүзләре белән Кайбыч муниципаль районы башлыгы Альберт Рәхмәтуллин чыгыш ясады. «Яңа ел алдыннан без күркәм гадәт буенча үзебезнең районның агросәнәгать комплексы алдынгыларын җыябыз. Болар – игенчеләр, терлекчеләр, агрофирмалар җитәкчеләре, кече һәм урта бизнес вәкилләре һәм районыбыз иминлеге, халык муллыгы өчен көн-төн армый-талмый хезмәт итүче башка бик күпләр. Бездә дус, тату, хезмәт сөючән команда эшли. Хөрмәтле авыл хезмәтчәннәре, районны үстерүгә керткән өлешегез өчен сезгә олы рәхмәтемне белдерәм! Сезнең алда баш иям!» – диде ул.
“Татарстан Республикасы авыл хуҗалыгының атказанган хезмәткәре” күкрәк тамгасы белән “Дубрава” агрофирмасы” хуҗалыгы җитәкчесе Александр Тутаев бүләкләнде, Россия Федерациясе Авыл хуҗалыгы министрлыгының Рәхмәт хаты белән АПК ветераны, җитештерү-маркентинг бүлеге консультанты Илһамия Нигъмәтҗанова бүләкләнде.
Авыл хуҗалыгы алдынгыларын Татарстан Республикасы авыл хуҗалыгы һәм азык-төлек министры урынбасары Ришат Хәбипов та котлады.