Чүпрәле районыннан кыр хәбәрләре: сыйфатлы орлык һәм минераль ашлама – югары уңышка нигез
Бүгенгә Татарстанда барлык чәчүлек мәйданының 62%ында, ягъни 884,6 мең гектарда бөртекле һәм кузаклы культуралар җыелды. Республиканың кайбер районнарыннан бөртеклеләрне җыю тәмамлану турында хәбәрләр килә.
Шулай итеп, беренчеләрдән булып Чүпрәле районының “Чынлы” (“Цильна”) ҖЧҖ бөртекле культуралар җыюны тәмамлады. Бөртекле һәм кузаклы культуралар мәйданы биредә 2 мең га чамасы. Хуҗалык югары репродукцияле орлыкларга игътибар бирә. Чәчелгән орлыклар - барысы да районлаштырылган һәм 100%ы да югары репродукциле. Бер гектар чәчүлеккә 105 кг минераль ашлама кертелгән. Шулар һәм, әлбәттә, тырышлык нәтиҗәсендә 10112 тонна ашлык җыелган. Һава шартларына карамастан, бер гектардан 50,8 центнер уңыш алынган.
Бу урып-җыю сезонында икмәк суктыруда иң югары күрсәткечләргә ирешүчеләрдән Рафик Шәйдулловны әйтергә кирәк – ул 2018 елда да Татарстанның иң яхшы комбайнчыларының берсе иде. «Класс Тукано» комбайнында ул быел 24000 центнер ашлык суктырган. 21000, 20000, 19000, 17000 центнер ашлык суктыручылар - Илдус Җәмдиханов, Илгиз Миначев, Радик Төхфәтуллов һәм Фәнис Вәлиев. Илдус Җәмдиханов шулай ук узган ел “Иң яхшы комбайнчы” республика конкурсында призер иде. Комбайнчылар быел да акчалата премияләр алдылар.
Бүгенге көндә хуҗалыкта көзге культуралар чәчәләр һәм туфрак эшкәртү эшләре бара.
Татарстан Республикасы Авыл хуҗалыгы һәм азык-төлек министрлыгының оператив белешмәләре буенча, Чүпрәле районында 27 августка 21,4 мең га мәйданда ашлык суктырылган, бу барлык урып-җыю мәйданының 63%ын тәшкил итә, 58,9 мең тонна ашлык җыелган, бер гектардан уртача 27,5 центнер уңыш чыга.