Кайбыч районыннан кыр хәбәрләре: алдынгылар байрагы иң яхшы комбайнчылар кулында
Узган атнада район башлыгы Альберт Рәхмәтуллин һәм Авыл хуҗалыгы һәм азык-төлек идарәсе башлыгы Радик Камалетдинов район хуҗалыкларында булдылар һәм алдынгы механизаторларны бүләкләделәр.
Рәхмәт хатлары һәм акчалата премияләр белән “Дубрава” агрофирмасыннан Айрат Сафиуллин, “Кубня” агрофирмасыннан Альберт Лазарев, “Золотая Нива” агрофирмасыннан Вячеслав Туртыгин һәм “Туган Як-агро” агрофирмасыннан Фәнис Бикбов бүләкләнделәр.
“Дубрава” агрофирмасыннан Айрат Сафиуллин берничә атна инде алдынгылар рәтендә. “Класс-Тукано” комбайнында ул 9163 центнер ашлык суктырган. 2018 елда ул Татарстанның иң яхшы комбайнчылары рәтендә иде.
“Золотая Нива” агрофирмасында соңгы җидекөнлектә шулай ук узган ел “Иң яхшы комбанчы” республика конкурсында җиңүче Вячеслав Туртыгин алда бара. “Класс Мега” комбайнында ул 9267 центнер ашлык суктырган.
Комбайнчы Фәнис Бикбов ел саен зур күрсәткечләргә ирешә. Быел да ул 4739 центнер ашлык суктырган инде.
Район буенча “Кубня” агрофирмасы алдынгылыкны бирми. Узган атнада комбайнчы Илдар Шәрәфиев алга чыккан булса, бу атнада Альберт Лазарев алга чыкты. Ул да Татарстан буенча узган елның иң яхшы комбайнчысы иде. “Класс Мега” комбайнында ул 10376 центнер ашлык суктырган. Гадәттәгечә, район башлыгы Альберт Рәхмәтуллин һәм Авыл хуҗалыгы һәм азык-төлек идарәсе башлыгы Радик Камалетдинов, шулай ук агрофирма директоры Валерий Поляков аңа ике күчмә байрак тапшырдылар, берсе - районныкы булса, икенчесе - агрофирманыкы, тагын Рәхмәт хаты һәм акчалата премия бирделәр һәм алга таба уңышлар теләделәр.
Татарстан Республикасы Авыл хуҗалыгы һәм азык-төлек министрлыгының оператив белешмәләре буенча, Кайбыч районында 26 августка 13,1 мең га мәйданда ашлык суктырылган, бу - фараздан 66%, 38,9 мең тонна ашлык җыелган, бер гектардан уртача уңыш - 29,6 центнер.