Сарманлылар уракка чыктылар
Сарман районы игенчеләре бүген уракка чыктылар. “Җәлил” агрофирмасының Карамалы җитештерү комплексында көзге бодайны суктыра башладылар.
«Биредә бу культура барысы 2836 гектар мәйданны били. Ә әлеге кырның мәйданы – 279 гектар, – дип сөйли комплекс идарәчесе Равил Әхмәтов. – Әлегә бер гектардан уртача уңыш 37,7 центнер тәшкил итә. Элеваторга 100 тоннадан артык ашлык озатылды инде».
Хуҗалыкта мехотрядның тугыз комбайны эшли, ә агрофирманың үзенең сигез комбайны күрше кырда эшли. Кыр читендә техник хезмәт күрсәтү бригадасы, янгын сүндерү машинасы тора, шунда ук – ягулык-майлау материаллары белән машина да тора. Районның Авыл хуҗалыгы һәм азык-төлек идарәсе башлыгы Альберт Шәрипов игенчеләрне урак өсте башлану белән котлады һәм аларга уңышлы эш көннәре теләде.
Район буенча 51 000 гектар мәйданда уңыш җыясы була. Кырларга җәмгысе 96 комбайн чыгачак. Узган еллардагы кебек үк, комбайнчылар арасында ярыш оештырылган. Аңа һәр биш көн саен йомгак ясалачак.