Кайбыч районында гадәттәге комбайннар парады узды
17 июльдә Кайбыч районы авыл хуҗалыгы оешмаларында гадәтәге комбайннар парады узды, шул ук вакытта техниканың 2019 елгы урып-җыю эшләренә әзерлеге дә тикшерелде. Тикшерүдә район башлыгы Альберт Рәхмәтуллин, Дәүләт техника күзәтчелегенең Татарстан Республикасы буенча Идарәсе башлыгы - баш дәүләт инженер-инспекторы Радик Зыятдинов, районның Авыл хуҗалыгы һәм азык-төлек идарәсе башлыгы Радик Камалетдинов, хуҗалыклар, Авыл хуҗалыгы һәм азык-төлек идарәсе белгечләре катнашты.
Тикшерү барышында комбайннарның техник төзеклеге һәм герметиклыгы каралды. Барлык техника сынауны тиешле дәрәҗәдә узды һәм аларны файдалануга рөхсәт бирелде.
Бәяләү күрсәткечләре буенча призлы урыннар түбәндәгечә билгеләнде: 1 урында — “Агрофирма «Кубня» агрофирмасы” ҖЧҖ, 2 урынны «Золотая Нива» (“Алтын Нива”) агрофирмасы” ҖЧҖ һәм «Дубрава» (“Имәнлек”) агрофирмасы” ҖЧҖ бүлештеләр, 3 урында – “Подберезье” агрофирмасы” ҖЧҖ.
Чара азагында район башлыгы Альберт Рәхмәтуллин механизаторларга намуслы һәм тырыш хезмәтләре өчен рәхмәт белдерде һәм алар алдына уңышны вакытында һәм югалтуларсыз җыеп алу бурычын куйды. “Безнең уңышның язмышы сездән тора”, - диде Альберт Илгизәр улы. Шулай ук Дәүләт техника күзәтчелегенең Татарстан Республикасы буенча Идарәсе башлыгы - баш дәүләт инженер-инспекторы Радик Зыятдинов та чыгыш ясады. Ул техника иминлеге һәм хезмәтне саклау мәсьәләләренә аеруча игътибарлы булырга өндәде.