Татарстанның авыл хуҗалыгы җитештерүчеләре язгы кыр эшләре өчен ягулыкны ташламалы бәядән алачаклар
Гомумән алганда, 2019 елда республика хуҗалыкларына сезонлы кыр эшләрен башкару өчен 140 мең тонналап ягулык-майлау материаллары кирәк булачак.
«Бүгенгә ташламалы бәя буенча бер тоннага 42,7 мең сумнан 70 мең тонна дизель ягулыгы алу өчен “Татнефть“ белән килешү төзелде, бу чәчү кампаниясен оптималь срокларда тәмамларга мөмкинлек бирәчәк», – дип хәбәр итте Татарстан Республикасы авыл хуҗалыгы һәм азык-төлек министры урынбасары Илдус Габдрахманов.
Аның әйтүенчә, язгы кыр эшләренә 11 мең трактор, 6шар мең чәчкеч һәм культиватор, 650 киң алымлы чәчү комплексы җәлеп ителәчәк. Бүгенгә барлык хуҗалыкларда тракторларның һәм башка авыл хуҗалыгы техникасының 95% проценттан артыграгы ремонтланган һәм чәчү кампаниясенә әзер.
«8 апрельдән республиканың барлык районнарында техниканың язгы кыр эшләренә әзерлеген тикшерү өчен комиссияләр оештырыла», – дип өстәде Габдрахманов.