Аграрийларның көндәлек мәшәкатьләре: Чирмешән районында 2018 ел йомгаклары буенча сөт җыючылар һәм сөт тапшыручылар слеты узды
Район Мәдәният йортында узган чарада һәр авылдан сөт җыючылар һәм сөт тапшыручылар катнашты. Кунакларның берсенә - Лашман авылыннан Хәдичә Лотфуллинага 78 яшь. Ул гомер буе терлекләр асраган һәм бүген дә үз тормышын аннан башка күз алдына китерә алмый.
«Безнең хуҗалыкта 12 баш сыер бар, һәркөнне 85 килограмм сөт тапшырабыз, - дип сөйли ветеран, - саву аппаратыбыз да бар, аны районнан бушлай биргәннәр иде. Сыерларны улым белән икәү карыйбыз. Эштән курыкмыйм. Яшьтән эшләп үскән бит, буем әллә ни булмаса да, ашлык тулы капчыкларны җилкә аша ташлау берни тормый иде».
2018 елда районның шәхси хуҗалыкларыннан 76 миллион 299 мең сумлык 3815 тонна сөт сатып алынды һәм сөт эшкәртүчеләргә тапшырылды. Шәхси хуҗалыклардан сөт җыюны оештыру районда төп бурычларның берсе. Чирмешән районы башлыгы Фердинат Дәүләтшин бу өлкәдә эшләүчеләрнең барысына да рәхмәт белдерде. «Сөт – ул кеше өчен иң кирәкле стратегик продуктларның берсе. Аны җитештерү, сату, эшкәртү һәм әзер продукцияне халыкка җиткерү – күләмле һәм авыр эш», - диде район башлыгы.
Кече фермалар арасында сөт тапшыру буенча иң югары күрсәткечләргә Туймәт авылыннан Мидхәт Кәримовта, 2018 елда ул әзерләүчеләргә 49 тонна сөт тапшырган. Икенче урында - Кара Чишмә авылыннан Роза Шәфикова (33 тонна), өченче урында - Иске Үтәмеш авылыннан Сәгыйть Хөснетдинов (32 тонна).
100 тоннадан артык сөт җыючыларны да бүләкләделәр, болар: Тәлгать Мөгыйзов (Иске Кади), Флер Әхмәтҗанов (Кармыш), Маргарита Белорусова (Ивашкино).