Татарстан Республикасы Сарман районында алдынгы терлекчеләрне бүләкләделәр

Татарстан Республикасы Сарман муниципаль районында 2017 елда уңышка ирешкән терлекчеләрне бүләкләделәр. Бүләкләрне район башлыгы Фәрит Хөснуллин, районның Авыл хуҗалыгы һәм азык-төлек идарәсе башлыгы Альберт Шәрипов, нәсел эше бүлеге башлыгы Дамирә Ханнанова бирделәр.

«Шундый хезмәт ярышы — хезмәткәрләр өчен менә дигән стимул», – диде район башлыгы Фәрит Хөснуллин.

Иң күп сертификатларны “Җәлил” агрофирмасы хезмәтчәннәре алды - 121 сертификат. Шундый ук 119 сертификат «Сарман» агрофирмасы алдынгыларына бирелде, 84 - «Нөркәй» агрофирмасы хезмәткәрләренә. Декабрьдә машина белән сыер саву буенча иң яхшылар дип түбәндәгеләр танылды: «Сарман» агрофирмасының Кәүҗияк бүлекчәсеннән Кәримә Кәрәмова (терлекчелек комплекслары арасында) һәм “Җәлил” агрофирмасының Ләшәү-Тамак бүлекчәсеннән Тәсмия Назарова (сөт-товар фермалары арасында). «Иң яхшы терлекче» номинациясендә җиңүче булып Рубис Ситдиков танылды (“Җәлил” агрофирмасының Ләшәү-Тамак бүлекчәсеннән), «Иң яхшы бозау караучы» номинациясендә җиңүче – Ленар Нигъмәтҗанов («Сарман» агрофирмасының Кәүҗияк бүлекчәсеннән), «Бозаулар үстерү юнәлешендә иң яхшы терлекче» номинациясендә җиңүче – Альберт Никоноров («Нөркәй агрофирмасының Юлтимер бүлекчәсеннән) «Ясалма орлыкландыру буенча иң яхшы технолог” номинациясендә җиңүче – Людмила Гимадиева (“Җәлил” агрофирмасының Ләшәү-Тамак бүлекчәсеннән), «Иң яхшы лаборант» номинациясендә җиңүче – Әлфия Гайнетдинова («Сарман» агрофирмасының Кәүҗияк бүлекчәсеннән).

Дүртенче квартал йомгаклары буенча «Сөт-товар комплексы башлыгы» номинациясендә җиңүче булып Илфак Нуриәхмәтов танылды («Сарман» агрофирмасының Кәүҗияк бүлекчәсеннән), «Сөт-товар фермасы мөдире” номинациясендә җиңүче - Рамил Шәйдуллин (“Җәлил” агрофирмасының Ләшәү-Тамак бүлекчәсеннән), «Бозаулар үстерү юнәлешендә иң яхшы ферма мөдире» номинациясендә җиңүче булып Салават Габидуллин танылды («Сарман» агрофирмасының Чукмарлы бүлекчәсеннән).