Татарстан Республикасы Чирмешән муниципаль районының авыл җирлеге башлыгы үз хуҗалыгында 13 баш эре мөгезле терлек тота

Татарстан Республикасы Чирмешән муниципаль районының Югары Кәминкә авыл җирлеге башлыгы Кирам Гыйләҗев үз хуҗалыгында 13 баш эре мөгезле терлек тота, шул исәптән 7 баш савым сыеры. «Гаиләдә һәрвакыт сыер асрый идек. Мин терлекчелек белән шөгыльләнүне үгезләр симертүдән башладым. Хәзер итне сату авыррак, ә сөткә ихтыяҗ һәрвакыт бар. Хөкүмәт тә бу юнәлештә зур ярдәм күрсәтә. Мәсәлән, бина төзү өчен без 200 мең сум күләмендә субсидия алдык, саву аппаратын район хакимияте бушлай бирде», – дип сөйләде Кирам Гыйләҗев.

Аның әйтүенчә, алар һәркөнне 60-65 килограмм сөт сатканнар, хәзер әзрәк – 30-35 кг. Озакламый сыерлары бозаулый башлый икән. «Кыш чыгар өчен 74 бәйләм (тюк) печән, 42 рулон салам әзерләдек, шулай ук 11 тонна ашлык фуражы бар. Бакчада 3 тоннага якын кабак үстердек, аны ваклап бирәбез, – ди җирлек башлыгы. – Тапшырылган сөткә исәп-хисапны вакытында ясыйлар, гаилә бюджетына килә торган керем начар түгел. Авылда да яхшы яшәп була, хәзер бит республикада кече хуҗалыкларга ярдәм итүгә зур игътибар бирелә».