Татарстан Республикасы Лаеш районыннан шәхси эшкуар яшел суган уңышын җыя
Бу көннәрдә Татарстан Республикасы Лаеш муниципаль районыннан шәхси эшкуар Ринат Хәмидуллин үзенең алты теплицасының берсендә яшел суган уңышын җыя башлады. Объект Александровский поселогы янәшәсендә урнашкан.
«Һәркайсының мәйданы 600 кв. м булган алты теплица төзүне планлаштырабыз. Гомуми мәйданы 3600 кв. м булачак. Чәчүне елга ике мәртәбә башкарабыз, чөнки без стеллажлар кулланабыз, – дип сөйләде Ринат Хәмидуллин. – Теплицаны урнаштыру технологиясе катлаулы түгел. Агач каркас арасында һава “мендәре” калдырыла – Төркиядә эшләнгән ике-өч катлы пленка тарттырыла. Өстән агроспан беркетелә: ул түбәдән теплицага су агып төшүдән саклый. Мондый конструкция җылыны әйбәт саклый. Суган сабагы яшел булсын өчен температураны 10 градуска киметәбез, ә тизрәк үссен өчен 19 градуска кадәр арттырабыз. Теплица күмер һәм утын белән ягыла»