«Нурлат аграр техникумы» дәүләт аграр һөнәри белем бирү учреждениесе студентлары “Яшь профессионаллар” чемпионатына әзерләнә

Киләсе атнада «Нурлат аграр техникумы» дәүләт аграр һөнәри белем бирү учреждениесендә Татарстан Республикасында “Яшь профессионаллар” төбәк чемпионатының чираттагы этабы кысаларында эчке ярышлар башлана.

Студентлар сигез компетенциядә үз осталыкларын тикшерәләр: пешекче һәм кондитер эше, татар милли ризыклары, икмәк-күмәч әйберләре, җиңел автомобильләрне ремонтлау һәм аларга хезмәт күрсәтү, йөк техникасына хезмәт күрсәтү, авыл хуҗалыгы машиналарын эксплуатацияләү, электр-монтаж эшләре.Барлык ярышлар йомгаклары буенча ноябрь ахырында команда төзеләчәк, ул «Нурлат аграр техникумы» дәүләт аграр һөнәри белем бирү учреждениесе исеменнән чемпионатның чираттагы этабында катнашачак.

Техникум директорының фән-методика эше буенча урынбасары Ирина Зайцева сүзләреннән аңлашылганча, «Авыл хуҗалыгы машиналарын эксплуатацияләү» компетенциясендә «Авыл хуҗалыгы механизациясе» белгечлегенә укучы 100 студент ярышачак. «Бу һөнәргә ихтыяҗ зур һәм студентлар да күп җыела, – дип сөйли Ирина Зайцева. – Студентлар авыл хуҗалыгы эшләре барышында предприятиеләрдә җитештерү практикасы узалар – аларда кирәкле барлык күнекмәләр бар».

Аның әйтүенчә, булачак белгечләрнең бу чемпионатта катнашу теләге зур. «Егетләр җиңүгә өметләнәләр. Алар, барлык технологик таләпләрне үтәп, биремнәрне үтәүгә ныклап, зур җаваплылык тоеп әзерләнәләр», – дип билгеләп үтте Ирина Зайцева.