Министрлыкта дәүләт хезмәткәрләре өчен стажировка узды
13-14 ноябрьдә Татарстан Республикасы Авыл хуҗалыгы һәм азык-төлек министрлыгында «Финанс ярдәме алу өчен документлар пакетын рәсмиләштерү һәм экспертизалау» программасы буенча дәүләт граждан хезмәткәрләре стажировка үтте. Стажировкада Казан шәһәреннән, Әлки, Әтнә һәм Питрәч муниципаль районнарыннан дәүләт хезмәткәрләре катнашты.
Стажировканы ябуда Татарстан Республикасы авыл хуҗалыгы һәм азык-төлек министры урынбасары Марсель Мәхмүтов, Министрлык хезмәткәрләре, шулай ук Югары дәүләт һәм муниципаль идарә мәктәбе проекты җитәкчесе Эльвина Бадгиева катнашты.
.jpg)
Стажировка программасына түбәндәге темалар кертелгән: Татарстан Республикасы Авыл хуҗалыгы һәм азык-төлек министрлыгы эшчәнлегендәге аспектлар, кече хуҗалыкларны, терлекчелек һәм игенчелек тармакларын үстерү программалары, АПКны техник яктан яңадан җиһазлау программалары, АПКда инновация, максатчан инвестиция, социаль программалар һәм практик дәресләр.
Стажировка буенча практик дәресләрне Министрлыкның бүлек хезмәткәрләре үткәрде. Алар норматив документларны ничек дөрес тутырырга икәнен күрсәттеләр, дәүләт ярдәме алу өчен документлар пакетын алу һәм аларны тармаклар буенча бүлү процесслары турында сөйләделәр.
.jpg)
Стажировка узучы дәүләт хезмәткәрләре авыл хуҗалыгының аерым тармакларын үстерү программалары буенча документлар пакетын детальләштерү һәм финанс ярдәмен җайга сала торган норматив хокукый актлар турында да фикер алыштылар. Гаризаларны рәсмиләштерүдә типик хаталарны тикшерделәр.
Стажировка азагында министр урынбасары Марсель Мәхмүтов катнашучыларга таныклыклар тапшырды һәм алдагы эшләрендә уңышлар теләде.