Марат Җәббаров: “Татарстан Кулланучылар оешмалары берлеге (Татпотребсоюз) илдә әйдәүче кулланучылар оешмасы булып кала”
Бүген «Үзәк кулланучылар җәмгыяте» КҖ (ПО) базасында Татарстан Республикасы кулланучылар җәмгыятьләре һәм кооперативлары вәкилләренең гомуми хисап җыелышы узды. Анда Татарстан Республикасы Премьер-министры урынбасары — авыл хуҗалыгы һәм азык-төлек министры Марат Җәббаров, Россия Федерациясе Кулланучылар җәмгыятьләренең үзәк берлеге идарәсе рәисе урынбасары Виталий Бродский, Татарстан Республикасы Дәүләт Советының Экология, табигатьтән файдалану, агросәнәгать һәм азык-төлек сәясәте комитеты рәисе Азат Хамаев, Татарстан Кулланучылар оешмалары берлеге (Татпотребсоюз) идарәсе рәисе Рашат Шәймәрданов катнаштылар.
Хисап чорында кулланучылар җәмгыятьләре һәм кооперативлары, Татарстан Кулланучылар оешмалары берлеге Советы һәм идарәсе эшчәнлеге Татарстан Республикасында кулланучылар кооперациясен үстерү концепциясе чараларын гамәлгә ашыруга, аның икътисадый нәтиҗәлелеген арттыруга һәм аларның мәнфәгатьләрен яклауга юнәлдерелгән иде.
"Кооператорлар мобиль сәүдә форматында 1216 торак пунктка хезмәт күрсәтәләр, төрле товарлар белән тәэмин итү буенча халыкның барлык үтенечләрен оператив рәвештә хәл итәләр. Һәр автолавка ай саен уртача 385 мең сумнан артык товар сата", - дип билгеләп үтте Рашат Шәймәрданов.
Үзебезнең продукцияне җитештерү тармагы - кулланучылар кооперациясе системасының уңышлы эшчәнлегенең нигезе. Ел буена үзебезнең продукцияне җитештерү күләме 3,3 млрд сумнан артып киткән.
Республикада “Авыл кибете” программасы уңышлы гамәлгә ашырыла. Бүген халыкка комплекслы хезмәт күрсәтү буенча 145 пункт эшли, агымдагы елда тагын шундый 7 пункт төзеләчәк. Алар аша уртача айлык товар әйләнеше 547 мең сумлык булган.
Кулланучылар оешмалары берлеге идарәсе рәисе, көчле конкуренция шартларында сатып алучылар өчен нәтиҗәле һәм уңайлы сату алымнарын сайлау зур әһәмияткә ия, алар товар үсешенә, халыкның ихтыяҗын яхшырак канәгатьләндерергә ярдәм итә һәм кибетләрнең табышлы эшләвен тәэмин итә, дип ассызыклады.
"Бүген тормыш һәм эшчәнлек шартлары бик тиз үзгәрә, икътисадый, социаль һәм мәдәни мөнәсәбәтләрнең яңа системасы барлыкка килә. Безнең бурыч - авыл халкын товарлар һәм хезмәт күрсәтүләр белән тәэмин итү мәсьәләләрендә җирле үзидарә органнарының конкурентлыкка сәләтле һәм ышанычлы партнеры булып калу.
Кулланучылар кооперациясе оешмалары чылбырны төгәл төзергә тиеш: әзерләү - эшкәртү - сату. Шулай булганда һәр звено ышанычлы рәвештә көчәя, яхшы нәтиҗәләргә ирешә, башка структуралар белән уңышлы конкурентлык итә ала. Һәр коллективта яхшы программа, үсеш нокталары һәм идеяләре булырга тиеш. Без бары тик алга барырга тиеш!", — дип, нәтиҗә ясады Рашат Шәймәрданов.
Виталий Бродский үз чыгышында агросәнәгать комплексы хезмәткәрләренә фидакарь хезмәтләре һәм керткән зур өлешләре өчен рәхмәт белдерде һәм кулланучылар кооперациясе системасында Татарстан Республикасының роле зур булуын ассызыклады.
Киңәшмә барышында Марат Җәббаров 2024 ел йомгаклары турында сөйләде. Ел йомгаклары буенча авыл хуҗалыгы продукциясенең тулаем күләме 341 млрд сумнан артып киткән, чагыштырма үсеш - 110,1%, азык-төлек сәнәгате күләме - 340,4 млрд сум, үсеш - 106%.
Республикада 3,9 млн тонна ашлык, 1 млн 250 мең тоннадан артык бәрәңге һәм яшелчә, 2,4 млн тонна шикәр чөгендере җыелган.
Узган ел 23 ярминкә чарасы үткәрелгән, аларда 1 млрд 700 млн сумлык продукция сатылган, шул исәптән Татарстан Кулланучылар оешмалары берлеге оешмалары тарафыннан - 200 млн сумлык.
"Болар барысы да шәһәр халкына сыйфатлы һәм натураль продукцияне уңай бәяләрдән сатып алырга мөмкинлек бирде. Бу җиңел эш түгел. Безнең халык та, гражданнар да бу башлангычларны уңай кабул итә", - дип билгеләп үтте Марат Җәббаров.
Марат Җәббаров әйтүенчә, бүген кулланучылар кооперациясе системасының мөмкинлекләре аз түгел, әмма очрый торган кыенлыклар да бар. Катлаулы икътисадый вәзгыятькә карамастан, Татарстан кулланучылар оешмалары берлеге илдә әйдәүче кулланучылар оешмасы булып кала.
Чара азагында кулланучылар җәмгыятьләренең һәм кооперативларының алдынгы хезмәткәрләрен бүләкләү тантанасы булды.
Әлеге чара «Азык-төлек иминлеген технологик тәэмин итү» илкүләм проекты максатларына һәм бурычларына туры килә.