Теләче районында азык әзерләү үзәге ачылды
21 февральдә Татарстан Республикасы Премьер министры урынбасары – Татарстан Республикасы авыл хуҗалыгы һәм азык-төлек министры Марат Җәббаров Теләче муниципаль районында “Игенче” ҖЧҖ каршында Белоруссиядә җитештерелгән җайланма - азыкны стационар ваклый торган «Хозяин» ССК-21В аппараты һәм тасма конвейеры нигезендә төзелгән терлек азыгы әзерләү үзәген ачу тантанасында катнашты.
Фермада азык әзерләүне гамәлгә кертү барлык төрдәге эре мөгезле терлекләрне туклыклы рацион белән тәэмин итәргә һәм сөт җитештерүчәнлекне шактый арттырырга ярдәм итәчәк. Терлекләр өчен индивидуаль сайланган, туклыклы, күпкомпонентлы азыкны заманча җайланмалар ярдәмендә бер оператор әзерли ала. Азык үзәгендә бер сәгатьтә 6,8 тоннага кадәр терлек азыгы әзерләргә мөмкин.
Моннан тыш, Теләче районында 500 башка исәпләнгән заманча сөтчелек комплексын төзү планлаштырыла. Бүген шулай ук аны проектлаштыруга «Игенче» ҖЧҖ һәм «АПК Проект» ҖЧҖ арасында килешү имзаланды.
Чара ахырында Татарстан Республикасы Авыл хуҗалыгы һәм азык-төлек министрлыгы башлыгы татарстанлыларны республикада гамәлгә ашырыла торган Илкүләм проектларда активрак катнашырга өндәде.