Рөстәм Миңнеханов «ТатАгроЭкспо» күргәзмәсендә авыл хуҗалыгы казанышларын бәяләде
Бүген Татарстан Республикасы Президенты Рөстәм Миңнеханов «Казан Экспо» күргәзмә үзәгендә Татарстан Республикасы Авыл хуҗалыгы һәм азык-төлек министрлыгының Агросәнәгать форумы кысаларында ачылган «ТатАгроЭкспо» махсуслаштырылган күргәзмәсендә булды. аның белән бергә Татарстан Республикасы Премьер министры урынбасары – Татарстан Республикасы авыл хуҗалыгы һәм азык-төлек министры Марат Җәббаров йөрде.
Татарстан Республикасы Президентына заманча авыл хуҗалыгы техникасын, җайланмалар һәм запас частьләр күрсәттеләр. Ул шулай ук республиканың аквакультура хуҗалыклары эше белән танышты, крестьян-фермер хуҗалыкларының һәм авыл хуҗалыгы кулланучылар кооперативларының продукциясен бәяләде.
Моннан тыш, Рөстәм Миңнеханов Бөек Җиңүнең 75 еллыгына һәм ТАССРның 100 еллыгына багышланган стендларны карап чыкты, аларда агросәнәгать комплексының казанышлары һәм авыл хуҗалыгы өлкәсенең үсеше чагылдырылган. Әйтергә кирәк, Татарстан Республикасы Авыл хуҗалыгы һәм азык-төлек министрлыгы да 100 еллыкка әзерләнә, 1920 елның 27 маенда Игенчелек буенча халык комиссариаты төзелгән. Ел дәвамында барлык авыл хуҗалыгы ветераннарын котлау планлаштырыла.
«Авыл хуҗалыгының барлык тармакларын чагылдырган күргәзмә өч көн буена эшләячәк, биредә техника һәм эшкәртү җайланмаларыннан алып, орлыкчылык өлкәсендәге фәнни казанышларга һәм авыл хуҗалыгы продукциясенә кадәр күрсәтелгән. Татарстаннан, Россиянең башка төбәкләреннән барысы 150дән артык экспонент урнаштырылган», - дип сөйләде Татарстан Республикасы Авыл хуҗалыгы һәм азык-төлек министрлыгы башлыгы Марат Җәббаров.
Аның әйтүенчә, өч көн эчендә күргәзмә эшендә 10 меңләп кеше катнашачак. «Казан Экспо» агрокүргәзмәсе 12 февральдән 14 февральгә кадәр эшли. Форум кысаларында күләмле эш программасы каралган, аның белән сылтама буенча танышырга мөмкин.