Район хәбәрләре: Балтач районында әче туфракны известьлауга чыгымнарның 90%ын бюджеттан компенсацияләү турында игълан иттеләр
Балтач районында «Балтачагрохимсервис» ҖЧҖ базасында Татарстан Республикасы авыл хуҗалыгы һәм азык-төлек министры урынбасары Илдус Габдрахманов рәислегендә Агрохимсервис предприятиеләренең 2019 елдагы эшенә йомгаклар һәм 2020 елга бурычлар буенча республика семинар-киңәшмәсе узды.
Чарада Татарстан Республикасы экология һәм табигать байлыклары министры урынбасары Тимур Гыйләҗев, Татарстан Республикасының табигатьтән файдалану мөнәсәбәтләрен җайга салу идарәсе башлыгы Самат Вахитов, "Татагрохимсервис" ОАПО генераль директоры Рөстәм Кәлимуллин, «Недрапроект» ҖЧҖ директоры Камил Шәйхетдинов һәм башка җаваплы затлар катнашты. Киңәшмә барышында 2020 елда әче туфракны известьлау мәсьәләләренә һәм карьерларның известь ашламалары җитештерү буенча эшенә, шулай ук “Җир байлыклары турында”гы Законның үтәлешенә аерым игътибар булды. 2019 ел йомгаклары турындагы нотык белән «Татагрохим» ААҖ генераль директоры Наил Гобәйдуллин чыгыш ясады.
Башкарылган эшләрнең, күрсәтелгән хезмәтләрнең, җитештерелгән продукциянең гомуми күләме 1 млрд. 627 млн сумнан артык. 2018 елга карата 115% тәшкил итә. Бер хезмәткәрнең хезмәт җитештерүчәнлеге 2 млн 379 сум тәшкил итә. Бер ел эчендә әче туфракны известьлау эшләре 57,2 мең га мәйданда башкарылган. Карьерларда 324 мең тонна вак таш (щебень), 600 мең тонна известьлы ашламалар җитештерелгән. Республика районнарында гомуми суммасы 55 млн сумлык 51 км авыл хуҗалыгы юллары төзелде һәм ремонтланды. Йомгаклар ясаганнан соң якындагы көннәргә һәм 2020 елга бурычлар билгеләнде.
Шулай ук «Татарский» Үзәк агрохимия хезмәте станциясе” (ЦАС) ФДБУ директоры Әнәс Локманов, «Әлмәт» Агрохимия хезмәте станциясе” (САС) ФДБУ директоры Мөгътәсим Маметов чыгышлар ясадылар. Киңәшмәдә катнашучылар “Россиянең мелиоратив комплексын үстерү” ведомство программасы белән таныштылар. Әлеге программа буенча 2020 елда әче туфракны известьлау өлкәсендәге чараларга субсидияләр бирү каралган. Субсидияләр авыл хуҗалыгы җитештерүчеләре тарафыннан тотылган чыгымнарның 90%ын каплый.
Семинарның практик өлеше барышында киңәшмәдә катнашучылар Татарстан Республикасы Балтач районының Көньяк Арбаш карьерында ташлы ком һәм акбур җитештерү буенча бара торган эшләр, шулай ук «Балтачагрохимсервис» ҖЧҖ остаханәләрендә известьлау отряды техникасын ремонтлауны оештыру һәм башкару белән таныштылар.