«Агрокөч» Кытай һәм Малайзия базарларына үз продукциясен чыгаруны планлаштыра
«Агрокөч» холдингы 2020 елда үз продукциясен Кытайга чыгара башлауны планлаштыра. Предприятие шулай ук Малайзия базарына да чыгарга ниятли. Бу хакта «Агрокөч. Чаллы-МПК» ҖЧҖенә матбугат туры вакытында «Агрокөч» АҖ генераль директоры Светлана Барсукова хәбәр итте.
«Кытай базарына чыгу мөмкинлеге буенча актив эш алып барабыз. Анда кош ите һәм сөт продукциясе чыгарырга телибез. Хәзер продукциясе Россия Федерациясе Авыл хуҗалыгы министрлыгы аша Кытай базарына аккредитацияләнә торган предприятиеләр исемлегендә торабыз. 2020 елда без бу базарга чыгарбыз һәм җитештерүчеләр буларак үз продукциябезне җибәрә башларбыз, дип ышанам», – дип сөйләде холдинг башлыгы.
Светлана Барсукова, предприятие шулай ук БДБ илләре, мәсәлән, Төрекмәнстан, базарына чыгуны планлаштыра, анда әзер продукциягә ихтыяҗ шактый зур, дип өстәде.
Холдингның гендиректоры урынбасары Дамир Имамов хәбәр итүенчә, «Агрокөч. Чаллы-МПК» предприятиесе 2017 елның мартында гамәлгә куелган һәм бүгенге көндә тәүлеккә 144 тонна продукция җитештерә. Бу, аерым алганда, 84 тонна әзер продукция (казылыклар, ветчина, сосискалар, деликатеслар, ысланган продукция) һәм тиз туклану рестораннары өчен 60 тонна ярымфабрикатлар – маринадлар, купатлар, фарш, шашлык һәм башкалар. «Бу - азык-төлек тармагы буенча иң заманча предприятие», – диде ул.
«Агрокөч. Чаллы-МПК» җитештерү предприятиесен гамәлгә кертү холдингка җитештерелә торган продукциянең күләмен берничә мәртәбә арттырырга һәм кош ите продукциясен тирәнтен эшкәртү буенча иң эре федераль җитештерүчеләр унлыгына керергә мөмкинлек бирде. Комплексны төзүгә инвестицияләрнең гомуми күләме 3 млрд сумнан артыграк булды, шуның яртысыннан артыгы объектны технологик җиһазлауга тотылды. Предприятиенең уникаль үзенчәлекләреннән берсе - әзер продукциянең роботлаштырылган склады, аның сыйдырышлылыгы 300 тоннадан артып китә. Комплексның аерым керү юллары бар, бу һәркөнне 200 тоннадан артык продукция чыгарырга мөмкинлек бирә.