Лаеш районыннан кыр хәбәрләре: органик ашламалар кертү үз нәтиҗәсен бирде – гектардан 60 центнер уңыш чыга
Сентябрь ае, көз чынлап торып үз халәтенә керә. Бу айда игенчеләр кыр-басуларда ел йомгаклары ясый.
Бу атнада Лаеш районы башлыгы Михаил Афанасьев һәм районның Авыл хуҗалыгы һәм азык-төлек идарәсе башлыгы Виталий Германов «Сәетов И.Р.» КФХында булдылар һәм 2019 елда хуҗалыкта бөртекле культуралар буенча иң күп уңыш җыеп алуга ирешкән комбайнчы Айнур Вәлиуллиннны район башлыгының Рәхмәт хаты һәм акчалата премия белән бүләкләделәр, алга таба да шул темпта эшләвенә ышаныч белдерделәр.
Механизатор эшли торган кырның мәйданы 100 га тәшкил итә, биредән алынган уңыш бер гектардан 60 центнерга кадәр җитә. Тумышы белән ул Кама Аланыннан, яшәве - Казанда, «Сәетов И.Р.» КФХында сервис инженеры булып эшли. Көзен ул комбайнга утыра.
«Хезмәт сөючән егет, һәр эшне җиренә җиткереп башкара, - дип сөйли Айнур Вәлиуллин турында фермер хуҗалыгы башлыгы Илнур Сәетов.
«Яратель» кошчылык фабрикасының янәшәдә генә булуыннан файдаланып, хуҗалык җитәкчесе Илнур Сәетов, барлык технологияләрне үтәп, бирегә органик ашлама кертә башлый. Ул башта технологияне өйрәнә, аннары аны үз кырларында куллана, ә моның икътисадый нәтиҗәсе шактый җитди килеп чыга. Хуҗалык минераль ашламалар белән эшләми диярлек, бары тик органик матдәләр генә куллана», - дип сөйләде район башлыгы Михаил Афанасьев.
Татарстан Республикасы Авыл хуҗалыгы һәм азык-төлек министрлыгының оператив белешмәләре буенча Лаеш районында ашлык 24,5 мең га мәйданда суктырылган, бу барлык урып-җыю мәйданының 99%ын тәшкил итә, 65 мең тонна ашлык җыелган, бер гектардан уртача 26,5 центнер уңыш чыга.