Республиканың 20 районы уракка төште
Татарстанның 20 районы игенчеләре бөртекле культураларны урып-җыю эшен алып бара. Шуның тугызында ашлык суктыралар.
Бүгенге көндә көзге арыш 0,4 мең гектар, көзге бодай 0,5 мең гектар, борчак 0,1 мең гектар мәйданда урып-җыеп алынган. 2,4 мең тонна ашлык суктырылган. Уртача уңышның күләме - 1 гектардан 18 центнер.
Алдынгылар рәтендә әлкилеләр. Алар 2505 гектар мәйданда ашлык җыеп алган. Исегезгә төшерик, быел, үткән ел белән чагыштырганда, урып-җыю эшләре 10 көнгә иртәрәк башланды.
Бер үк вакытта терлек азыгы хәзерләү дәвам итә. Республикада һәр шартлы терлеккә уртача 11,4 центнер азык тупланган. Мамадышта бу күрсәткеч 15,9 центнер, Буада – 14,4 центнер; Биектау, Кукмара районнарында 14 центнерга якын тәшкил итә, Менделеев, Чистай, Әтнә районнарында 10 центнерга да җитми.
Гомумән алганда, республикада 513 мең тонна печән, 1,5 мең тонна яфраказык киптерелгән.