Хезмәт кешеләре: Азнакай районыннан 50 елдан артык хезмәт стажына ия умартачы
Умартачы - катлау, әмма шул ук вакытта бик кызыклы һөнәр. Ул һөнәр генә дә түгел, ә тормыш рәвеше. Умартачылар арасында үз эшләренә битараф караучылар юк – аларның һәркайсы үз һөнәренә мөкиббән китеп гашыйк. Безнең “Хезмәт кешеләре” рубрикасының бүгенге герое да шундыйлардан. Ул - авыл хуҗалыгында 50 елдан артык эшләүче Зәйдуллина Гасимә Бари кызы.
Гасимә Бари кызы 1950 елның 4 апрелендә Азнакай районының Көчле Бүләк авылында туган. 16 яшьтән районның Вахитов ис. совхозында эшли башлый. Урта мәктәпне тәмамлагач, 1967 елда Кама Тамагы районының Теньки авылында авыл һөнәр-техник училищесына “Умартачы” юнәлеше буенча укырга керә. 1968 елда Вахитов ис. совхозда умартачы ярдәмчесе булып эшли башлый. Ул, бу һөнәрне бик тиз үзләштереп, умартачы булып эшли башлый һәм бал кортлары оясын 100гә җиткереп арттыра. 2009 елдан Гасимә Бари кызы Азнакай районы умартачысы - Урманай авылында шәхси ярдәмче хуҗалык башлыгы.
Гасимә Зәйдуллина 50 елдан артык үзенең яраткан эше белән шөгыльләнә һәм һәрдаим бал кортлары оясын арттыруны максат итеп куя. Шул ук вакытта, әлбәттә, бал сыйфатына зыян китермичә, балны арттыру буенча да армый-талмый эшли. Мәс., 2015 елда шәхси ярдәмче хуҗалыкта 50 бал корты оясы булса, 2016 елда - 60, 2017 елда умарта оясы 85кә җиткән. 2014 елдан 2018 елга кадәр бер оядан бал агызу шулай ук 30 кг-нан 55 килограммга кадәр җиткән. 2018 ел сезонында 3 тонна бал алынган.
Төп эшеннән тыш, Гасимә Бари кызы хәйриячелек белән дә шөгыльләнергә вакыт таба. Бал уңышын җыйганнан соң, ул ялгыз яшәүче авылдашларына бал өләшә, иганәчелек ярдәме итеп Победа поселогындагы, Урманай авылындагы мәчетләргә дә, шулай ук Азнакай шәһәрендәге үзәк мәчет каршындагы мәдрәсәдә дини чаралар оештырганда куллану өчен дә балдан өлеш чыгара. Зәйдуллинаның намуслы хезмәте муниципаль, республика бүләкләре һәм башка кыйммәтле бүләкләр белән бәяләнә. Ул умартачылар арасында да, авылдашлары һәм район җитәкчелеге тарафыннан да күптән инде олы ихтирам һәм абруй казанган, тынгы белмәс хезмәт кешесе.
Аның бүләкләре арасында: СССР ВДНХсының Көмеш медале, Татарстан Республикасы Умартачылар сәнәгатенең Мактау грамотасы, Азнакай шәһәре һәм Азнакай районы хакимияте башлыгының Мактау грамотасы, Татарстан Республикасы Умартачылык идарәсенең Мактау грамотасы, Азнакай шәһәре һәм Азнакай районы хакимияте башлыгының Рәхмәт хаты, Татарстан Республикасы Авыл хуҗалыгы һәм азык-төлек министрлыгының Мактау грамотасы һәм Россия Федерациясе Авыл хуҗалыгы министрлыгының Рәхмәт хаты бар.