Теләче районында алдынгы комбайнчыларга сертификатлар тапшырдылар
Татарстан Республикасы Теләче муниципаль районы кырларында бар куәткә урып-җыю эшләре бара. Оператив белешмәләр буенча, 15 августка, районда 8,9 мең га чәчүлек мәйданы суктырылган, бу планнан 39,6 % тәшкил итә. 22,1 мең тонна ашлык җыелган, уртача уңдырышлылык - 24,8 ц/га.
14 августта Теләче муниципаль районы башлыгы Илдус Зарипов, районның Авыл хуҗалыгы һәм азык-төлек идарәсе башлыгы Рәлиф Низаметдинов, Татарстан Республикасы Авыл хуҗалыгы һәм азык-төлек министрлыгының инвестиция сәясәте һәм максатчан программалар бүлеге башлыгы Илдар Гафуров районның алдынгы комбайнчыларына чираттагы акчалата сертификатларны тапшырдылар.
Комбайнчылар арасында ашлык суктыру буенча алдынгылар рәтендә: Фәрит Вәлиев - «Теләче Агро» (786 тн.) ҖЧҖеннән, Ренат Гатауллин - «Алан» ҖЧҖеннән (747 тн), Фәргать Исмәгыйлев - «Теләче Агро» ҖЧҖеннән (695 тн), Илһам Мөҗипов - «Алан» ҖЧҖеннән (680 тн), Садыйков Хазинур - «Теләче Агро»ҖЧҖеннән (653 тн), аларның һәрберсе акчалата премияләр алды.
Шулай ук бөртекле һәм кузаклы культураларны чаптыручы алдынгы комбайнчылар да акчалата премияләр белән бүләкләнделәр, болар: Хәмит Кәримуллин - «Игенче» ҖЧҖеннән (705 га), Айрат Сабиров һәм Рәфис Шәйхетдинов - «Алан» ҖЧҖеннән (1108 га).