Татарстан Мәскәүдә узачак “Алтын көз” агросәнәгать күргәзмәсенә үзендә җитештерелгән экологик чиста һәм натураль продукция алып барачак
9 октябрьдән 12 октябрьгә кадәр Татарстан Мәскәүдә тагын “Алтын көз” агросәнәгать күргәзмәсендә катнашачак. Республика үз стендында Татарстанда үстерелгән һәм җитештерелгән экологик чиста, натураль продукция күрсәтәчәк.
Милли татар кухнясының үзенчәлекләрен 100 елдан артык эшләү тарихы булган Татарстан Республикасы Кулланучылар кооперациясе оешмалары берлеге - «Татпотребсоюз» тәкъдим итәчәк. Кунаклар өчен күргәзмә карау гына түгел, ә иң тәмле милли ризыкларны татып карау мөмкинлеге дә булачак.
Күргәзмәгә төрле бал продукциясен «Татарстан Республикасының аквакультура һәм умартачылык идарәсе» әзерли, стендта балның, перганың, серкәнең төрле сортлары һәм балавыз продукциясе булачак.
Казылык әйберләрен, кош итен, сөт продукциясен һәм бакалеяны Россиянең эре агрохолдингларының берсе - “Агрокөч” алып килә. Яңалыклардан – натураль төтендә ысланган продукция.
«Пестречинка» ҖЧҖ шулай ук тавык итеннән төрле продукция алып барачак. Предприятие 40 елдан артык базарда һәм кош итеннән 200ләп төрле продукция чыгара. Кошчылык фабрикаларында ысланган әйберләр элеккеге рецептлар буенча әзерләнә.
Сөт продукциясен Зеленодольск сөт комбинаты алып барачак, ул 1957 елда оешкан һәм «Очень важная корова», «Васькино счастье» һәм «Обнимама» брендлары белән 80нән артык төрдә продукция чыгара. «2019 елда зур гаиәләр өчен без яңа форматтагы сөт шешәсендә - 1400 граммлы “гаилә” сөтен чыгара башладык. Уңайлы савытта - стаканда йомшак эремчекнең классик төре дә, шулай ук төрле өстәмәләр белән дә: шоколад ваклары, җир җиләге (клубника), персик, кара җиләк, чия белән чыгарыла. Базарга ярмаланып тора торган эремчек яңа төргәктә - “капчыкта” чыкты», - дип сөйлиләр предприятиедә.
Белоглазов Е.Е КФХсы сөт, эремчек, кефир, йогуртлар, ряженка, катык, каймак, корт һәм кайнаган сөт алып бара. «Безнең продуктлар үзебезнең чималдан элеккеге рецептлар буенча әзерләнә, бу сөт продуктларының тәмен һәм файдасын арттыра», - дип сөйли фермерлык хуҗалыгы башлыгы.
Ел саен 42 000 тоннадан артык яшелчә җыючы “Майский” теплица комбинаты күргәзмәгә үз продукциясен: томат, кыяр, борыч, баклажан, яшел тәмләткечләр, җир җиләге һәм күк җиләк алып бара. Комбинат, заманча технологияләр кулланып, кыяр уңышын иң алдынгы европалылар дәрәҗәсенә җиткерде – елга 203 кг/кв.м., ә помидор уңышы бер квадрат метрдан 113 кг чыга.
«Татспиртпром» компаниясе киң даирә кулланучылар өчен алкоголь продукциясе алып бара. Компания 1997 елда Татарстан Республикасы Хөкүмәте карары белән төзелгән һәм Россиядә җитештерелә торган барлык аракының 11,2%ын җитештерерлек куәткә ия (2018 ел белешмәләре буенча).
«Нәфис-Биопродукт» АҖ күргәзмәгә үзенең соңгы яңа эшләнмәләрен алып бара: соя соусы, «Базилик һәм бөтнек» джемы, «Мүк җиләге һәм гөлҗимеш» джемы, «Абрикос» джемы, «Кызыл карлыган» джемы, «Болоньезе» соусы «Карбонара» соусы; көнбагыш майлары: кара сарымсак экстракты белән май, «Прованс үләннәре» экстракты белән май, «Кызыл сицилия апельсины» экстракты белән май, «Дүрт борыч» экстракты белән май һәм башкалар.
«Bionovatic» компаниясе күргәзмәдә шулай ук үзенең яңа эшләнмәләрен күрсәтергә җыена: болар - Россиядә бүгенге көнгә иң көчле тәэсир итә торган бердәнбер сыек биоинсектицид һәм гербицидлар деструкторы.
Ә «Биопрепаратлар» фәнни-җитештерү институты» ҖЧҖ күргәзмәгә органиканы компенсацияләү өчен уникаль биопродукт – терлек асты-үсемлек, салам калдыкларының тизрәк таркалуына китерә торган «Уникальный Гумус+» биодеструкторын алып бара.