«Агроволга-2021» халыкара агросәнәгать күргәзмәсендә яңартылган «Казанка» су сиптерү машинасын күрсәттеләр
2021 елның 1 июленнән 3 июленә кадәр «Казан Экспо» халыкара күргәзмә үзәге территориясендә илнең авыл хуҗалыгы тармагының төп вакыйгаларының берсе - «Агроволга-2021» халыкара агросәнәгать күргәзмәсе узды.
Чара авыл хуҗалыгын үстерү мәсьәләләренең киң спектры буенча фикер алышу, ул шулай ук өр-яңа продуктларны һәм технологияләрне, шул исәптән мелиорация өлкәсендә дә, күрсәтү мәйданчыгы булды.
Авыл хуҗалыгы культураларын сугару өчен күргәзмә янындагы мәйданчыкта «Татмелиорация» ААҖ һәм «Татмелиоводхоз «идарәсе» ФДБУ көчләре белән кышкы чорда сугару челтәре проектланды, төзелде һәм яз көне уңышлы эшли башлады.
Әлеге проект ясалма сулыкны, суга ике скважинаны, энергия белән тәэмин итү системасын, заманча тирән насос станциясен, шулай ук төрле типтагы су сиптерү машиналары белән, шул исәптән Татарстанда җитештерелә торган «Казанка» киң колачлы су сиптерү җайланмалары белән дә, су сибүне оештырырга мөмкинлек бирә торган торбаүткәргеч челтәрен үз эченә ала.
Агымдагы елдагы аномаль корык шартларында ясалма сугару системасы яхшы шытымнар алырга һәм тәҗрибә кырларында авыл хуҗалыгы культураларының биологик уңышыннан күргәзмә оештырырга мөмкинлек бирде. Мелиорация системасы ярдәмендә экспонентлар игү технологияләренең аерым элементларының өстенлеген һәм авыл хуҗалыгы культуралары сортларының максималь генетик куәтен, шулай ук вегетация чорында аларның табигый дымлылык белән тәэмин ителүгә һәм башка табигать-климат шартларына бәйсез булуын күрсәтә алдылар.
Күргәзмәдә Татарстанда Казан сугару техникасы заводында җитештерелгән «Казанка» киң колачлы су сиптерү машинасының яңартылган үрнәге күрсәтелде, катнашучылар аны эшләү барышында күрделәр. Завод продукциясе инде бишенче ел республика кырларында эшли һәм үзен аграрийларның ышанычлы партнеры буларак күрсәтте, ул үз характеристикалары буенча Европа аналогларыннан калышмый. Шул ук әлеге машиналарның бәясе 30%ка арзанрак.
Мелиораторлар экспозициясендә Татарстан Республикасы Президенты Рөстәм Миңнеханов булды. Республика башлыгына яңгыр сиптерү машинасының яңа үрнәге һәм сугару системасы белән читтән торып идарә итү системасы күрсәтелде. «Татмелиорация» траст компаниясе генераль директоры Рөстәм Сөнгатуллин модернизацияләнгән машинаның үзенчәлекләре турында сөйләде һәм авыл хуҗалыгы товарлары җитештерүчеләр исеменнән республика җитәкчелегенә мелиорация өлкәсендә зур ярдәм күрсәткәннәре өчен рәхмәт белдерде. Федераль һәм республика максатчан программалары хуҗалыкларга мелиорацияне үстерүгә чыгымнарның 70%ын компенсацияләргә мөмкинлек бирә. Соңгы елларда республикада гамәлдәге программалар кысаларында 30 мең гектардан артык сугарулы җирләр төзелгән һәм торгызылган.
Республика башлыгы төбәк мелиораторлары эшенә югары бәя бирде һәм Татарстан өчен тармакның мөһимлеген һәм киләчәктә мелиорацияне үстерү кирәклеген билгеләп үтте.
"Үсемлекчелек" секциясенең эшлекле программасы кысаларында «Татмелиоводхоз» идарәсе ФДБУ директоры Марс Хисмәтуллин чыгыш ясады. Ул форумда катнашучыларны Татарстан Республикасы территориясендә мелиорация буенча, шулай ук игенчелекнең адаптив-ландшафт системасын эшләү һәм үзләштерү, туфракның уңдырышлылыгын торгызу өлкәсендә гамәлгә ашырыла торган программалар белән таныштырды. Узган 2020 елда «Татмелиорация» системасы бүлекчәләре тарафыннан 128дән артык мелиорация объектында төзелеш эшләре алып барылган, шул исәптән федераль программа кысаларында 270 млн.сумлык, гомуми мәйданы 2270 га булган 4 эре федераль мелиоратив объект төзелгән һәм вакытыннан алда файдалануга тапшырылган, 3 мең гектардан артык мәйданда 6 хуҗалыкара сугару системасын реконструкцияләүгә проектлар эшләнгән, алар агымдагы елда уңышлы гамәлгә ашырыла.
Гомумән алганда, максатчан программалар кысаларында 2020 елда 6,2 мең гектардан артык сугарулы җир файдалануга тапшырылган, бу 2019 ел күрсәткечләреннән 80%ка күбрәк һәм соңгы 5 елда рекордлы күрсәткеч булып тора. Шулай ук төбәктә 87 мең га мәйданда әче туфрак известьландырылган. 2020 елда мелиорация бүлекчәләре тарафыннан 2,3 млрд. сумлык проект эшләнгән, төзелеш-монтаж эшләре башкарылган.
Исегезгә төшерәбез, Татарстан – хәвеф-хәтәргә бирешүчән игенчелек төбәге, бездә соңгы вакытта коры еллар ешрак кабатлана һәм яңгырлы еллар сирәгрәк була. Бу шартларда аграр җитештерүгә комплекслы мелиорация ярдәмгә килә. Сугару чаралары уңышны тулысынча яисә шактый өлешен компенсацияләргә мөмкинлек бирә.