Татарстан игенчеләре 4 млн. тоннадан артык ашлык җыйдылар, республиканың 33 районында урып-җыю эшләре дәвам итә
Республикада бөртекле культуралар 1 млн 345,9 мең гектардан артык мәйданда суктырылды, бу барлык урып-җыю мәйданының 95%ын тәшкил итә. Республикадла тулаем ашлык җыемы 4 млн тоннадан артып китте.
«Министрлыкның оператив белешмәләре буенча бүгенге көнгә 4 млн 35,3 мең тонна ашлык җыелган. Бер гектардан уртача уңыш 30 центнер тәшкил итә, бу узган елның шушы датасына караганда 4 центнерга күбрәк», – дип сөйләде Татарстан Республикасы Авыл хуҗалыгы һәм азык-төлек министрлыгының игенчелекне үстерү бүлеге башлыгы Ирек Садыйков.
Ул билгеләп үткәнчә, республиканың 10 муниципаль районында бөртекле һәм кузаклы культуралар җыю төгәлләнгән, ә калган 33 районда бу культураларны җыю дәвам итә.
«Бу көнгә иң күп ашлык Тәтеш районында җыелган – 160,6 мең тонна. Бу күрсәткеч буенча икенче урында Буа районы – 160,2 мең тонна, өченче урында Арча районы – 158 мең тонна», – дип хәбәр итте агентлык әңгәмәдәше.
Ул шулай ук уртача уңдырышлылык буенча Зәй районының лидер булуын билгеләп үтте, анда һәр гектардан 40,1 центнер ашлык алынган. Лидерлар рәтендә шулай ук Тукай районы – 39,6 ц/га, Мамадыш районында – 39,5 ц/га, Актаныш районында – 39 ц/га, Минзәлә районында – 38,1 ц/га, Тәтеш районында – 37,2 ц/га.
Татарстан Республикасы Авыл хуҗалыгы һәм азык-төлек министрлыгының оператив белешмәләре буенча республикада бүгенгә рапс 12 мең гектарда суктырылган, бу фараздан 11,4% тәшкил итә. Бу май орлыгы 13,4 мең тонна җыелган, уртача уңыш - 11,2 ц/га. Шикәр чөгендере 8,1 мең гектарда чыгарылган (фаразга карата 12,5%). Ул 352,8 мең тонна җыелган, уртача уңыш – 437,4 ц/га.
Республика районнарында башка сезонлы эшләр дә дәвам итә. Аерым алганда, көзге культуралар 467,7 мең га (фаразга карата 86%) мәйданда чәчелгән, туфрак 644,9 мең га (30%) эшкәртелгән, дип билгеләп үтте Ирек Садыйков.